Полиция әлеуметтік желілерге мониторинг жүргізу барысында Threads желісіндегі күмәнді жазбаны анықтаған. Аталған факт бойынша ҚР Қылмыстық кодексінің 174-бабының 1-бөлігіне (Алауыздықты қоздыру) сәйкес қылмыстық іс қозғалған.
Полиция департаменті тергеу барысында күдіктінің елден кетуді жоспарлағанын анықтағанын хабарлады.
"Күдікті уақытша ұстау изоляторына қамалды. Тергеу нәтижесінде оның Threads әлеуметтік желісінде ұлтаралық алауыздықты қоздыру белгілері бар жазба жариялағаны анықталды. Сондай-ақ күдіктінің елден тыс жерге кетуді жоспарлағаны белгілі болғандықтан, оны қамауға алу түріндегі бұлтартпау шарасына санкция беру туралы өтініш берілді", - делінген департамент хабарламасында.
ҚР ҚК-нің 174-бабына сәйкес, бұл қылмыс үшін 2 000-нан 7 000 АЕК-ке дейін айыппұл (7 863 000 – 27 524 000 теңге), не бостандықты шектеу, не 2 жылдан 7 жылға дейін бас бостандығынан айыру жазасы қарастырылған.
2025 жылғы 22 шілдеде Қарағанды қаласының тергеу соты өтінішті қанағаттандырып, тергеу аяқталғанға дейін күдіктіні екі айға қамауға алу туралы шешім шығарды. Қазір істі тергеу жалғасып жатыр, тиісті сараптамалар тағайындалған. Нақты процессуалдық шешім сараптама нәтижесіне қарай қабылданады.