Tomiris командасы өкілдерінің бірі Балнұр Қиялбекова әлеуметтік желіде құлау, көгерген орындар, көз жасы сияқты кез келген адамды бей-жай қалдыра алмайтын видеомен бөлісті. Одан беделді турнирдегі ең күшті бәсекелестер арасындағы жеңісті тек төккен қан мен маңдай тердің арқасында қол жеткізілгенін көруге болады.
"Dubai SWAT Challenge 2026. Бұл - жеңістің сыртында көзге көрінбей қалған жасырын кадрлар. Бұл - менің үлкен арманымның орындалуы. Күн мен түн төгілген тер, еңбек, төзім мен сенім ақталды. Ең бастысы, еңбегіміз елеусіз қалмай, президентіміз тарапынан жоғары бағаланды. Бұл жеңіс - тек менікі емес, бүкіл командамыз бен еліміздікі", деп жазды желідегі парақшасында Балнұр Қиялбекова.
Команда дене шынықтыру, тактикалық және психологиялық дайындықтың жоғары деңгейін көрсетті, әйелдер командалары арасында І-ші орынды иеленді. Жалпы командалық есепте Tomiris 18-ші орынға ие болды, бұл - бірқатар ерлер бөлімшелерінен жоғары нәтиже әрі кәсіпқойлықтың, білімнің және дайындық сапасының маңызды дәлелі.
Президент Қасым-Жомарт Тоқаев Дубайда өткен UAE SWAT Challenge 2026 терроризмге қарсы бөлімшелерінің халықаралық жарыстарына қатысқан қазақстандық жасақты қол жеткізген керемет нәтижелерімен құттықтады.