Қазгидромет мәліметінше, 15 мамыр күні Алматы мен Көкшетауда, ал түнгі уақытта Астана мен Ақтөбеде қолайсыз метеорологиялық жағдай болжанып отыр.
Қолайсыз метеорологиялық жағдай – атмосфераның төменгі қабатында зиянды заттардың жиналуына ықпал ететін қысқа мерзімді ауа райы құбылыстарының жиынтығы. Оған желсіздік, әлсіз жел, тұман және ауа инверсиясы жатады.
Мұндай кезде тұрғындарға:
- ашық ауада ұзақ уақыт болмауға;
- әсіресе автожолдар мен ластаушы көздерге жақын жерлерде серуендеуді шектеуге;
- созылмалы өкпе, жүрек-қан тамырлары және аллергиялық аурулары бар адамдарға қажетті дәрі-дәрмектерін өзімен бірге алып жүруге кеңес беріледі.
Бұған дейін синоптиктер 15 мамырда еліміздің бірқатар өңірінде ауа райы күрт өзгеретінін хабарлаған болатын. Осыған байланысты Қазақстанның 16 облысында дауылды ескерту жарияланды.