Тұрғындар тілектерін түрлі түсті қағаздарға жазып, ағаштың бұтақтарына іледі. Дауыс беру басталғанына бір сағаттан енді асса да, тілектер саны көбейіп, бастапқыда бос тұрған ағаш біртіндеп түрлі түске бояла бастады.
Акцияға әртүрлі жастағы және түрлі салада еңбек ететін сайлаушылар белсенді қатысып жатыр. Олардың арасында жастар, аға буын өкілдері, кәсіпкерлер, түрлі сала мамандары мен қоғам белсенділері бар.
"Тілек ағашына" өз тілегін жазғандардың бірі – қоғамдық жұмыста мол тәжірибесі бар, бұған дейін бірнеше рет депутат болып сайланған кәсіпкер Валерий Симчук. Ол үшін бұл бастама ел мен өңірдің болашағына қатысты ойын білдірудің тағы бір мүмкіндігі болды.
"Мен ең қарапайым әрі маңызды дүниені тіледім – елімізде бейбітшілік пен тыныштық орнап, әр отбасында денсаулық, береке және ертеңгі күнге деген сенім болсын деп жаздым. Біреу отбасына, енді бірі балаларына немесе бүкіл елге арнап тілек қалдырып жатыр. Бірақ олардың бәрінде ізгі ниет бар. Бұл бастама көңіл күйімізді көтеріп, әрқайсымыздың өз арманымыз бен үмітіміз бар екенін еске салды. Барлық тілек орындалып, кешке қарай бұл ағаш ізгі ойларымыз бен ортақ үмітіміздің символына айналса екен", – деді Валерий Симчук.
Жас сайлаушылардың тілектерінде көбіне бейбітшілік, бақ-береке, жақындарының амандығы, оқу мен жұмыстағы жетістік, алға қойған мақсаттарына жету және жарқын болашақ құру секілді ниеттер жазылған. Сондай-ақ саяхат, мансап, отбасы және өзін-өзі дамытуға қатысты жеке армандарын бөліскендер де бар.
Акция ұйымдастырушыларының айтуынша, күн соңына дейін "Тілек ағашы" сайлаушылардың арман-тілектеріне толады. Түрлі түсті қағаздарға жазылған тілектер осы күннің естелігі ретінде сақталып, тұрғындардың ізгі ниеті мен ортақ үмітінің символына айналады.