Қазақстан Ұлттық статистика бюросының 2021 жылы жүргізген сауалнамасына сай, еліміздің барлық өңіріндегі үйлердің 10,2%-ында домбыра, 4,9%-ында гитара, 1,3%-ында клавишті аспап бар. Ал қалған 1,1%-ы басқа музыкалық аспаптармен қамтамасыз етілген.
Energyprom.kz-тің хабарлауынша, қалалық жерлердегі үйлерде көбіне домбыра мен гитара бар екен. Үйлердің 6,9%-ында домбыра, 4,2%-ында гитара, 1,3%-ында клавишті аспап болды. Ауылдық жерлердегі үйлердің 16,1%-ында домбыра, 6,1%-ында гитара, 1,3%-ында пернетақталы аспаптар бар. Қалаға қарағанда ауылдағы үйлерде домбыра мен гитара көбірек. Ал клавишті аспап екі жақта да бірдей.
Салыстыру үшін: 2020 жылдағы деректер бойынша сұралған үйлердің 9,6%-ында домбыра, 4,4%-ында гитара, 1,3%-ында клавишті аспап, 1%-ында басқа да аспаптар болған. Өңірлік тұрғыда 2021 жылы еліміздегі 17 облыстың 7-інде домбырамен қамтамасыз ету республикалық көрсеткіштен жоғары болып шықты. Түркістан облысы көш бастады: сауалнамаға қатысқан үй шаруашылықтарының 21,7%-ында домбыра бар. ТОП-3 өңірлер қатарына Маңғыстау (19,7%) және Жамбыл (16,9%) облыстары да кірді. Ең әлсіз көрсеткіш Қостанай облысында байқалды – небәрі 2,9%.
Гитара көбіне Маңғыстау облысындағы үй шаруашылықтарының иелігінде болды – 13,2%. Үздік үштікке Түркістан мен Атырау облыстары да кірді. Ең төмен көрсеткіш Шымкентте тіркелді. Түркістан облысы клавишті аспаптарда көш бастады – 3,4%. Екінші және үшінші орындарды Павлодар (2,8%) және Қарағанды (2,3%) облыстары иеленді.
Биылғы сәуір айының қорытындысы бойынша музыка сабағының құны бір жылда 5,3% өскен. Өңірлік тұрғыда бағаның айтарлықтай өсуі Қызылорда облысында байқалады – бірден жылына 31,9%-ға. Одан кейінгі орында Түркістан және Шығыс Қазақстан облыстары – сәйкесінше 20,4% және 16,4%. Бағаның айтарлықтай өсуі Батыс Қазақстан (плюс 15,5%) және Павлодар (плюс 10,8%) облыстарында да байқалды.
