Қостанай облысында жол апатынан 47 жастағы әйел көз жұмды, деп хабарлайды ҚазАқпарат облыстық ІІД баспасөз қызметіне сілтеме жасап.
Оқиға Амангелді ауданындағы Қарасу ауылының маңында болған.
«Жол апаты туралы аудандық ІІБ кезекші бөліміне аурухананың фельдшері хабарлады. Арқалық-Торғай тасжолында «Ауди 80» маркалы автокөлігінің жүргізушісі рөлге ие бола алмай, жолдан шығып кетті. Нәтижесінде көлікте отырған 47 жастағы жолаушы әйел оқиға орнында көз жұмды», - деді облыстық ІІД баспасөз хатшысы Ирина Беженар.
Медициналық сараптамаларға сәйкес, көлік жүргізушісі мас күйінде болмаған. Қазіргі уақытта ҚР ҚК 345-бабы («Жол қозғалысы ережесінің бұзылуы») бойынша сотқа дейінгі тергеу шаралары жүргізіліп жатыр.