2021 жылғы 15 наурызда Алматы облысының Боралдай кентінде Ұлттық қауіпсіздік комитеті басшылығының қатысуымен ҰҚК Авиация қызметінің қаза тапқан әскери қызметшілеріне әскери құрмет көрсету рәсімі өткізілді, деп хабарлайды zakon.kz.
Қаза болғандарды жерлеу орнына жеткізу үшін Ұлттық қауіпсіздік комитетінің жерүсті және әуе көлік құралдары тартылды.
ҰҚК қаза тапқан және зардап шеккен әскери қызметшілердің туыстары мен жақындарына барлық қажетті көмек пен қолдауды көрсетуде.
Қызметтік міндеттерін орындау кезінде қаза тапқан әскери қызметшілер еске алынып, ҰҚК Орталық аппаратының ғимаратында ведомстволық ту төмен түсірілді, сағат 17:22-де ұлттық қауіпсіздік органдарында "Бір минут үнсіздік" өткізіледі.
Құрылған ведомствоаралық жұмыс комиссиясы әуе апатының барлық мән-жайларын анықтау және борттық өздігінен жазатын құралды талдау бойынша жұмыс жүргізуде, деп хабарлады ҚР ҰҚК.
Нәтижелері туралы қосымша хабарланатын болады.
Алматы қалалық ТЖД-ға 13 наурызда сағат 17:25-те Алматы әуежайының диспетчерлік қызметінен 17:22-де АН-26 әскери ұшағы радардан жоғалып, әуежайға шұғыл қонғаны туралы ақпарат келіп түсті. Кейін төрт адамның қаза тапқаны, ал жарақат алған екі әскери қызметкер Алматыдағы No4 қалалық клиникалық ауруханаға жеткізілгені белгілі болды.
