ШҚО-да құрғақ шөптің өртенуіне қатысты 11 адам әкімшілік жауапкершілікке тартылды

Шығыс Қазақстан облысында бір тәулік ішінде өрт сөндіру бөлімшелері құрғақ шөптің өртенуі бойынша 26 факті тіркеді. Өрттің шығу себебі - азаматтардың отты пайдалануда абайсыздығы, деп хабарлайды Zakon.kz.

ШҚО Төтенше жағдайлар департаментінің хабарлауынша, 29 сәуірде құтқарушылар Алтай ауданында 28 гектар, Көкпекті ауданындағы Тұздыкөл учаскесінде 25 гектар, Үржар ауданында 20 гектар және Тарбағатай ауданында 20 гектар жазық даладағы өртті сөндірді.

Сурет: ШҚО ТЖД

Ғарыштан мониторингілеудің көмегімен ШҚО ТЖД құтқарушылары термиялық нүктелерді анықтайды.Соған сәйкес оттың одан әрі таралуына жол бермес үшін өрт сөндіру бөлімшелері жағдайды шұғыл пысықтайды. Бүгінгі күні өрт қауіпі күшейген кезеңнің басталғанынан бері 222 термо нүкте анықталды.

Облыста өрттердің алдын алу үшін құрамына құтқарушылар, жергілікті атқарушы орган қызметкерлері, полицейлер кіретін мобильді топтар құрылды.

Қазіргі уақытта өрт қауіпсіздігі ережелерін сақтамағаны үшін ҚР "Әкімшілік құқықбұзушылық туралы" Кодексінің 336-бабы бойынша 11 адам 336 930 теңге көлемінде айыппұл түрінде әкімшілік жауапкершілікке тартылды.

Сурет: ШҚО ТЖД

Қауіптіліктің төртінші класы Семей, Күршім, Бесқарағай аудандарында және Самар ауылында сақталған.