Алаяқтық жасаған күдіктіні криминалдық полиция басқармасы мен CyberPol арнайы бөлімшесінің қызметкерлері ұстады, деп мәдімдеді Қарағанды облысының полиция департаменті. Тергеушілердің айтуынша, ер адам жоқ пәтерлерді жалға беріп отырған.
Облыстық полиция департаментінің мәліметінше, Қарағандының үш тұрғыны құқық қорғау органдарына алаяқтық жасады деген шағыммен хабарласқан. Олар сайттардың бірінен жылжымайтын мүлікті жалға беру туралы хабарландыруларды көріп, "үй иесіне" алдын ала төлем ретінде 5 мыңнан 10 мың теңгеге дейін ақша жібергенін айтқан. Көрсетілген мекенжайларға барғанда ғана олар алаяққа алданып, сан соғып қалғанын ұққан.
Күдікті Жезқазған қаласында ұсталды. Ол 23 жастағы жігіт болып шықты. Күдікті қылмысын мойындап, алданған азаматтардан алған ақшаны букмекерлік кеңселерде бәс тігуге жұмсағанын айтқан, қазір Қазақстан Республикасының Қылмыстық кодексi 190-бабы бойынша сотқа дейінгі тергеу амалдары жүргізіліп жатыр.