ҚР ІІМ Ұйымдасқан қылмысқа қарсы күрес департаменті Үшінші басқармасы бастығының орынбасары Шынар Көшербаева ОКК алаңында ІІМ құрылымында адам саудасына қарсы күрес бөлімшелері жұмыс істейтіндігін айтты. Жыл сайын осыған байланысты 150-ге жуық қылмыстық іс қозғалады.
"Осы жылдың өткен кезеңінде 134 қылмыстық іс тіркелді. Оның ішінде: органдар саудалағаны үшін – 15 іс; адамды қанау мақсатында ұрлағаны үшін – 2; қанау мақсатында заңсыз бас бостандығынан айырғаны үшін – 3; адам саудасы үшін – 15; кәмелетке толмағанды жезөкшелікпен айналысуға тартқаны үшін – 12; кәмелетке толмағандарды саудалағаны үшін – 3; жезөкшелікпен айналысуға тартқаны үшін – 7; притон ұйымдастырғаны және жеңгетайлық жасағаны үшін – 77".Шынар Көшербаева
Сондай-ақ, жезөкшелікпен және жеңгетайлықпен айналысу үшін әдейі үй-жайлар беру бойынша 649 әкімшілік құқық бұзушылық анықталды, жалпы сомасы 155 млн теңгеге айыппұл салынды.
Бұған дейін ІІМ киберқылмысқа қарсы күрес бөлінісінің қызметкерлері Алматы қаласында төрт call-орталықты жойғаны хабарланды.