Видеодан тікұшақтың бірден әуеге көтерілмей, төменде біршама шайқалақтап тұрғанын, ал оның айналасында адамдар толы жүргенін көруге болады. Сол төмен күйінде алға бағыт алған тікұшақ бірнеше рет қисайып, тіпті әуе кемесінің қанаттары ағаш бұтақтарын да іліп кетеді. Сәлден кейін ғана тікұшақ биікке көтеріле алады.
"Қазавиақұтқару" компаниясының баспасөз қызметі атап өткендей, тікұшаққа байланысты оқиғада ешкім зардап шеккен жоқ. Ал тікұшақ ресми алаңнан алдын ала өтінім бойынша көкке көтерілген.
"Бортты кәсіби біліктілігі дәлелденген тәжірибелі ұшқыш басқарды. Ал ұшар алдында борт механигі жақын маңдағы азаматтарға қауіпсіздік қашықтығын сақтау қажеттігін ескерткен", - дейді мамандар.
Сондай-ақ "Қазавиақұтқару" ұшу кезінде желдің бағыты мен екпіні күрт өзгеріп, оның әуе кемесінің қалықтау тұрақтылығына әсер етуі мүмкін екенін айтады:
"Оқиғаның себептері ішкі тексеріс аясында белгіленеді. Тікұшақты жедел әрекет ету бригадасы тексерді, техникалық ақаулар анықталған жоқ".
Бұған дейін Алматының шетінде МАЗ маркалы кранның, №10 маршруттық автобустың және бірнеше жеңіл көліктердің қатысуымен жаппай жол апаты болып, 20-дан астам адамның зардап шеккенін жазғанбыз.