Министрдің сөзінше, перспективалы қорлар көбіне тереңдікте және геологиялық күрделі аймақтарда шоғырланған, бұл заманауи технологиялар мен инновациялық тәсілдерді қолдануды талап етеді. Сондықтан қазіргі уақытта геологиялық зерттеудің сандық көрсеткішінен сапасына көшуге басымдық беріліп отыр.
"Осы міндеттерді шешу аясында елімізде заманауи әдістерді қолданып, геологиялық зерттеулердің ауқымды бағдарламасын жалғастыру жоспарлануда", – деді Нағаспаев.
Оның айтуынша, келесі үш жылда 1:50 000 масштабтағы карталау бағдарламасы жүзеге асырылады, жалпы алаңы – 100 мың шаршы шақырым. Бұл жұмыстар заманауи әдістерді қамтиды: Жерді қашықтықтан зондтау, аэрогеофизикалық және геохимиялық зерттеулер.
"Сонымен қатар, Шу-Сарысу және Солтүстік Торғай аз зерттелген мұнай-газ перспективалы шөгінді бассейндерінде сейсмикалық зерттеу жұмыстары жүргізілмек. Алынған нәтижелер кейінгі нақты іздестіру және барлау жұмыстарын негіздейтін болады", – деді министр.
Еске салсақ, бұған дейін Қазақстандағы жаңа өндірістік мүмкіндіктер туралы премьер-министр Олжас Бектенов хабарлаған болатын.