Telegram-нан "жеңіл жұмыс" іздеген елордалық үш жылға сотталды

Фото: Zakon.kz
Telegram желісіндегі "жеңіл жұмыс" туралы хабарландыруға сенген 20 жастағы Астана тұрғыны алаяқтардың қылмыстық схемасына қатысқаны үшін үш жылға бас бостандығынан айырылды, деп хабарлайды Zakon.kz.

Алаяқтар Петропавлдағы егде жастағы тұрғындарға құқық қорғау органдарының қызметкерлері ретінде қоңырау шалып, жақындарының жол-көлік оқиғасына кінәлі болғанын айтқан. Оларды қылмыстық жауапкершіліктен босату үшін ақша талап еткен.

Қылмыскерлердің сөзіне сенген үш тұрғын 1 миллионнан 3 миллион теңгеге дейін қаражат берген. Ақшаны алаяқтық әрекеттен бейхабар такси жүргізушілері "сәлемдеме" ретінде жеткізген.

"Сәлемдемелерді" қабылдап, белгіленген жерлерге апару міндеті Telegram-нан жұмыс іздеген 20 жастағы елордалыққа жүктелген. Ол осы мақсатпен арнайы Петропавлға келген.

2025 жылғы 8 және 9 қыркүйекте жігіт үш "сәлемдемені" қабылдап, оларды бұталардың арасына және қоқыс жәшіктеріне жасырған.

Жәбірленушілер полицияға жүгінгеннен кейін жедел уәкілдер күдіктінің жеке басын анықтап, оны ұстады. Тергеу барысында жиналған дәлелдер оның қылмысқа қатысын растады.

Сот үкімімен алаяқтардың курьері үш жылға бас бостандығынан айырылып, келтірілген шығынды ішінара өтеуге міндеттелді. Сот шешімі заңды күшіне енді.

Полиция азаматтарды әлеуметтік желілер мен мессенджерлердегі күмәнді "жеңіл жұмыс" ұсыныстарына сақтықпен қарауға шақырды. Заңсыз табыс табуға әрекеттену қылмыстық жауапкершілікке әкеп соғуы мүмкін.

Қазақстан
Петропавл

Оқи отырыңыз

Жаңалықтан zakon.kz сайтында хабардар болыңыз:

Танымал жаңалықтар

Студенттің қазасынан кейін ҚазҰУ-де кешенді тексеру жүргізіледі

Әл-ауқатты бағалау калькуляторы қалай жұмыс істейді және пайдаланушылар нені білуі керек

Сабақтан қалу ерекше бақылауға алынады: Қазақстанда 21 қарашадан бастап жаңа ережелер енгізіледі

"Balapan"-ның күзгі базарлығы

Астанада жұмысшыларға шалшық су шашып кеткен жүргізуші 10 тәулікке қамалды