Қасым-Жомарт Тоқаев Бас прокуратураның басшылық құрамымен бейнебайланыс арқылы кеңес өткізіп, жаңадан тағайындалған Бас прокурор Берік Асыловты таныстырды.
Президент кеңесте азаптау, қатыгездік сияқты ортағасырлық құбылыстарды тамырымен жоюдың маңызын айтты. Бас прокуратураға тергеудегілер мен сотталғандарға адамгершілікке жатпайтын әрекеттерге жауапкершілікті күшейтуге бағытталған ұсыныстар әзірлеу тапсырылды, делінген Ақордадағы хабарламада.
Сонымен қатар мемлекет басшысы кінәлі адамдарға қатысты жауапкершілік шараларын қабылдай отырып, расталған әрбір хабарламаға дер кезінде мән беруді, тергеу барысы жөнінде халыққа уақтылы ақпарат таратуды тапсырды.
Президенттің сөзінше, қоғамдық-саяси тұрақтылыққа төнетін қатерді жою және әлеуметтік шиеленістерді шешу үшін қоғамда қолдау табатын жаңа идеялар мен тәсілдер, жаңаша ойлайтын жаңа кадрлар қажет.
Сонымен қатар ол бұрынғы Бас прокурор Ғизат Нұрдәулетовке атқарған жұмысы үшін ризашылығын білдіріп, оның жаңа қызметіне табыс тіледі.