Мемлекет басшысы атап өткендей, сайлауда Қазақстан халқы өз кандидатурасын қолдап, көптеп дауыс берді.
"Шын мәнінде, ел сенімін еш нәрсемен өлшеу мүмкін емес. Халықтың сенімі – ең құнды нәрсе. Сайлау нәтижесін халқымыздың саяси бағдарыма – бағасы, алдағы жоспарыма – батасы деп қабылдаймын. Халқының қолдауына ие болып, ел тізгінін ұстау – ер азамат үшін ең биік мәртебе әрі орасан зор жауапкершілік". Қасым-Жомарт Тоқаев
Мемлекет басшысы алдағы 7 жылды бүгінгі буынның және келешек ұрпақтың алдындағы борышымды өтеуге берілген бірегей мүмкіндігі деп білетінін де жеткізді.
"Қазақта "аманат" деген асыл ұғым бар. Халқымның сенімі – маған аманат. Осы аманатқа адал болу – мен үшін қасиетті парыз. Ел үмітін ақтап, Қазақстанды өркендеген, бақуатты мемлекетке айналдыру үшін қолымнан келгеннің бәрін жасаймын". Қасым-Жомарт Тоқаев
26 қарашада Астанада Тәуелсіздік сарайында ҚР Президенті Қасым-Жомарт Тоқаевтың салтанатты ұлықтау рәсімі өтті.
