Абай ауданы полиция басқармасына шұғыл байланыс желісі арқылы Достық ықшам ауданының тұрғыны шағымданған. Ол өз арызында ата-енесі мен жолдасының тарапынан қысым көріп, отбасылық жанжалдың жиілеп кеткендігін айтқан. Мәселенің мән-жайын анықтау үшін көрсетілген мекенжайға әйелдерді зорлық-зомбылықтан қорғау тобының инспекторы Гүлзира Бектемисова барып, жағдайдың жай-жапсарымен танысты. Нәтижесінде ер адамның үстінен қорғау нұсқамасы толтырылып, ол 30 тәулікке есепке алынды.
"Қазіргі таңда полиция қызметкерлері тұрмыстық зорлық-зомбылыққа тап болған азаматшаға құқықтық және психологиялық қолдау көрсету мақсатында баласымен бірге уақытша пана ретінде “Самғау сенім” орталығына орналастырды", делінген полиция хабарламасында.
“Самғау сенім” орталығы тұрмыстық зорлық-зомбылыққа ұшыраған көпбалалы аналарға, аз қамтамасыз етілген отбасыларға әлеуметтік көмек көрсетеді. Осы тұста тәртіп сақшылары жайсыз отбасылар мен түрлі отбасындағы зорлық-зомбылық салдарынан отбасы мүшелерінің зардап шегетінін айтып, оларға қатысты күш көрсету, кемсіту, ұрып-соғу жайттары бойынша заң жүзінде жауапкершілік қарастырылғанын ескертеді.
