Орал қаласының әкімшілік құқық бұзушылық жөніндегі мамандандырылған сотында йога жаттықтырушысы Маргарита Булдаковаға қатысты іс қаралып, шешім шығарылды.
Сотта 2023 жылы 21 маусымда "Салауатты өмір салты академиясы" қоғамдық бірлестігінің басшысы Б. қала стадионында "Дүниежүзілік йога күн" мерекесіне орай іс-шараны өткізуге рұқсат бергені үшін дене шынықтыру және спорт басқармасының басшысына құны 5 833 теңгені құрайтын йогамен айналысуға арналған кілемшені және "Zepter" фирмасының пышақтар жиынтығын сыйға тартқаны анықталды. Алайда келесі күні мемлекеттік қызметкер аталған сыйлықтар мемлекеттік мүлікті басқару жөніндегі уәкілетті органға өтеусіз негізде өткізіп берген.
Прокурор соттан құқық бұзушылықтың маңызы болмашы болуына байланысты Б. әкімшілік жауаптылықтан босатуды сұрады.
Б. лауазымды тұлғаға сыйлық беру ниеті болмағандығын көрсетіп, істі құқық бұзушылық құрамының болмауына байланысты тоқтатуды сұрады.
"Бұл ретте, сот әкімшілік құқық бұзушылық туралы іс бойынша барлық мән-жайларды, құқық бұзушының жеке басын, құқық бұзушылықтың сипатын, жауапкершілікті ауырлататын мән-жайлардың жоқтығын, сондай-ақ материалдық залал немесе өзге де зиян келтірудің жоқтығын ескере отырып, Б. құқық бұзушылықтың маңызы болмашы болуына байланысты әкімшілік жауаптылықтан босатып, ауызша ескертумен шектелді". Орал қаласының әкімшілік құқық бұзушылық жөніндегі мамандандырылған сотының баспасөз қызметі
Қаулы заңды күшіне енген жоқ.