Осыған байланысты Алматы қаласы бойынша Мемлекеттік кірістер департаменті 2024 жылдың 1 қазанында жеке тұлғалардың 2023 жылға арналған мүлік салығын төлеу мерзімі аяқталатынын еске салды.
Салық қалай есептеледі?
Жеке тұлғалардың салық салу объектілеріне қатысты салықты есептеу салық органдары тарапынан есептік салық кезеңінен кейінгі жылдың 1 шілдесінен кешіктірілмей салық салу объектісінің орналасқан жері бойынша жүзеге асырылады. Бұл ретте салық төлеушінің тұрғылықты жеріне қарамастан, меншік құқығында иелік ету мерзімін ескере отырып, тиісті салық мөлшерлемесі салық базасына қолданылады.
Салық органы есептеген салық сомасы туралы хабарлама есептелген күннен бастап 10 жұмыс күнінен кешіктірілмей салық төлеушіге жіберіледі, онда салық сомасы, БСК және басқа да деректемелер көрсетіледі.
Салық қашан төленуі керек?
Мүлік салығын әр жылдың 1 қазанына дейін төлеу қажет. Мысалы, 2023 жылға салықты 2024 жылдың 1 қазанына дейін төлеу керек, 2024 жылға – 2025 жылдың 1 қазанына дейін және т.б. Уақытында төлеу өсімпұл мен банктік шоттардың бұғатталуынан сақтайды.
Салықтан кімдер босатылады?
Кейбір санаттағы азаматтар, мысалы, ардагерлер, мүгедектер және көп балалы аналар салықтан толық немесе ішінара босатылады. Олардың толық тізімі ҚР Салық кодексінің 526-бабымен айқындалған.
Салық сомасын қайдан білуге болады?
Есептелген салық сомасы туралы ақпарат коммуналдық қызметтер түбіртегінде, eGov.kz порталындағы жеке кабинетте, e-Salyq Azamat мобильдік қосымшасында қолжетімді.
Сонымен қатар, Kaspi.kz, Homebank мобильдік қосымшаларының клиенттеріне алдағы төлемдер туралы PUSH-хабарламалар жіберілді. Салық сомасын Мемлекеттік кірістер комитетінің сайтындағы "Алдағы төлемдер" қызметі арқылы нақтылауға болады.
Салықты eGov.kz порталы, e-Salyq Azamat қосымшасы, банктік қосымшалар, төлем терминалдары арқылы төлеуге болады.
Егер мүлік ортақ меншікте болса, салықты меншік иелерінің бірі өзара келісім бойынша төлейді. Егер салық барлық меншік иелеріне есептелген болса, оны тек біреуі ғана төлейді.⠀
Салықты тек бір рет төлеу керектігін ескертілді: не коммуналдық қызметтердің түбіртегі арқылы, не мобильді қосымшалар және басқа да қолжетімді әдістермен.
