Бұл туралы ол Instagram-дағы парақшасында жариялаған видеода айтады. Ал видео сипаттамасында: "Қазақ елінен кешірім сұрап, 100 000 сом айыппұл төледім" делінген.
"...Осындай бір ағаттық жасап, Қырғыз елінің бюджетін 100 мың соммен толықтыруыма мүмкіндік берген Құдай Тағалаға мың да бір рақмет. Оразаларыңыз қабыл болсын", - дейді әнші видеода.
Айта кетсек, Қырғызстанның Ұлттық қауіпсіздік комитеті осы жылдың қаңтарында әнші Қайрат Примбердиевті ұлтаралық араздықты қоздыруға бағытталған мәлімдеме жасағаны үшін қамауға алып, оның елден шығуына тыйым салды. Ол Қазақстандағы "Айран медиа" жобасына қатысып, бағдарлама кезінде қазақ ханы Кенесарының басын кескен қырғыз ханы үшін өз атынан кешірім сұраған. Кейін Қайрат Примбердиев кешірімді бүкіл қырғыз халқының емес, жеке өз атынан сұрағанын мәлімдеді.