Ұлттық бірыңғай тестілеуге (ҰБТ) қатысуға өтініш берген, бірақ тестілеуге қатыспаған, сондай-ақ өтініш беру кезеңінде ҰБТ-ға қатысуға өтініш бермеген талапкерлерге тестілеу күндері аудиторияда бос орын болған жағдайда (қағаз форматтағы тестілеу үшін тиісті тестілеу тілінде) келесі негізді себептер бойынша ҰБТ-ға қайта тіркеліп, бір күнде қатысу мүмкіндігі беріледі:
- денсаулық жағдайы бойынша №026/у нысанына сәйкес дәрігерлік-консультациялық комиссияның қорытындысы немесе амбулаториялық картаның не ауру тарихының көшірмесі болған жағдайда, ол тестілеу күнімен сәйкес келуі тиіс;
- жақын туыстарының қайтыс болуын растайтын құжаттар болған жағдайда;
- жалпы білім беретін пәндер бойынша республикалық және халықаралық олимпиадаларға, ғылыми жобалар (ғылыми жарыстар) байқауларына, орындаушылар байқауларына, кәсіптік шеберлік конкурстарына және спорттық жарыстарға қатысқан жағдайда;
- төтенше жағдайлар болған жағдайда.
Қағаз форматындағы ҰБТ-да талапкер тиісті құжаттарды қоса бере отырып, мемлекеттік комиссия төрағасының атына қайта тестілеуге өтініш береді.
Электрондық форматтағы ҰБТ-да талапкер Ұлттық тестілеу орталығы директорының атына өтініш береді.
Сонымен қатар, электрондық форматтағы ҰБТ мынадай мерзімдерде өткізіледі:
1) 10 қаңтар – 10 ақпан аралығында:
- жалпы орта білім беру ұйымдарының 11 (12) сынып бітірушілері – өз қалауы бойынша жоғары оқу орындарына (ЖОО) ақылы негізде қабылдану үшін;
- алдыңғы жылдардағы мектеп түлектері, техникалық және кәсіптік немесе орта білімнен кейінгі білім беру ұйымдарының түлектері – республикалық немесе жергілікті бюджет қаражатынан білім беру грантын тағайындау конкурсына қатысу немесе ақылы негізде ЖОО-ға қабылдану үшін;
- шетелде оқыған мектеп түлектері, сондай-ақ шетелде білім алған, Қазақстан Республикасының азаматтары болып табылмайтын қазақ ұлтының өкілдері – жоғарыдағы мақсаттар үшін;
- күндізгі бөлімде ақылы негізде оқуға қабылданған, бірақ ҰБТ нәтижесі бойынша шекті балл жинамаған, бейіндік пәндер комбинациясы сәйкес келмейтін немесе ҰБТ нәтижелері жойылған талапкерлер – сол жылы қайтадан ақылы негізде ЖОО-ға қабылдану үшін;
- шығармашылық даярлықты талап ететін білім беру бағдарламалары бойынша оқитын және басқа білім беру бағдарламаларына ауысқысы келетін студенттер – ақылы негізде;
- педагогикалық ғылымдар саласына ауысқысы келетін студенттер – ақылы негізде.
2) 1 наурыз – 6 сәуір аралығында:
жоғарыда көрсетілген тұлғалар үшін, сондай-ақ жоғары оқу орындарына ақылы немесе грант негізінде түсу мақсатында.
3) 10 мамыр – 10 шілде аралығында:
- осы жылғы мектеп бітірушілер – грант конкурсына қатысу, ЖОО-ға ақылы негізде қабылдану немесе мемлекеттік тапсырыс бойынша оқу үшін;
- алдыңғы жылдардағы мектеп түлектері, техникалық және кәсіптік немесе орта білімнен кейінгі білім беру ұйымдарының түлектері – жоғарыдағы мақсаттар үшін;
- қысқартылған оқу мерзімдерін көздейтін жоғары білім беру бағдарламалары бойынша түсетін колледж түлектері – грант конкурсына қатысу үшін;
- шетелде оқыған мектеп түлектері және шетелде білім алған қазақ ұлтының өкілдері – жоғарыдағы мақсаттар үшін;
- ақылы бөлімде күндізгі оқу нысанында оқуға қабылданған, бірақ шекті балл жинамаған, бейіндік пәндер комбинациясы сәйкес келмейтін немесе ҰБТ нәтижелері жойылған талапкерлер – сол жылы қайтадан ақылы негізде ЖОО-ға қабылдану үшін.
- Бұл мерзімде ҰБТ тапсырған тұлғалар үшін бейіндік пәндерді өзгертуге жол берілмейді.
4) 10 – 20 тамыз аралығында:
- осы жылғы мектеп бітірушілер мен алдыңғы жылдардағы мектеп немесе колледж түлектері – жоғарыдағы мақсаттар үшін;
- шығармашылық даярлықты талап ететін білім беру бағдарламаларынан басқа бағдарламаларға ауысқысы келетін студенттер – ақылы негізде;
- педагогикалық бағыттарға ауысқысы келетін студенттер – ақылы негізде.
Сонымен қатар, егер халықаралық немесе шетелдік оқу орындары (немесе олардың филиалдары) Quacquarelli Symonds, Academic Ranking of World Universities, Times Higher Education халықаралық академиялық рейтингтерінің ТОП-250-на және/немесе Экономикалық ынтымақтастық және даму ұйымы (ЭЫДҰ) мен БРИКС елдерінің ұлттық рейтингтерінің ТОП-100-на кірсе, онда 1 және 2-тармақтарда көрсетілген мерзімдерде өткізілген ҰБТ нәтижелері республикалық бюджет есебінен білім беру грантын тағайындау конкурсына қатысу үшін жарамды болып табылады.
Бұйрық 2025 жылғы 3 шілдеден бастап күшіне енеді және 2025 жылғы 1 шілдеден бастап туындаған құқықтық қатынастарға қолданылады.