Павлодарда Суворов көшесі, 7/1 мекенжайы бойынша орналасқан көпқабатты тұрғын үйдің төртінші қабатындағы екі бөлмелі пәтерде үй жиһаздары өртенді, деп хабарлайды pavlodarnews.kz.
Бұл туралы агенттікке облыстық ТЖД мемлекеттік тіл және ақпарат тобы хабарлады.
- Қызыл жалын екі шаршы метр аумақты шарпыған. Оқыс жағдай орын алғаны туралы хабарлама кезекшілік бөліміне сағат 15.25-те түскен. Сағат 15.56-да толығымен сөндірілді. Құтқарушылар балкон арқылы автосатының көмегімен 10 адамды сыртқа шығарып, өрттен аман алып қалды. Оның төртеуі – балалар. Пәтер иесі 1959 жылғы азаматша. Қазіргі таңда келтірілген шығын көлемі мен өрттің шығу себебі анықталуда. Зардап шеккендер жоқ, - деді департаментте.
Тілсіз жауды ауыздықтауға бір автоцистерна жұмылдырылып, жеке құрамнан 15 адам жұмыс істеді.
Ақбота Сейсенбаева
Фото: pavlodarnews.kz