Жеңіс күні «Құлагер» ипподромында ат жарысы маусымының ашылу салтанаты өтті, деп хабарлайды pavlodarnews.kz тілішісі.
Мерекелік бағдарлама бойынша екі қашықтыққа ұшқыр жарыс, 6 шақырымдық құнан бәйге мен жорға бәйге, 10 шақырымға топ бәйге мен 16 шақырым аламан бәйге өтті. - Мереке күндері ипподромға келу менің отбасым үшін дәстүрге айналды, - деді Сәкен Жуасбаев.
– Балаларым мен жұбайым да бұл спорт түріне қызығушылықтарын танытуда. Бүгін ауа райы құбылмалы болса да, бәйгенің сәнін кетірмеді. Бәйгеге Астана, Қарағанды, Семей қалаларынан және облыс бойынша 40-қа жуық шабандоз қатысты. «Құлагер» ипподромында алғаш рет нәзік жанды атшабар өз бағын сынады.
Башқұрстан Республикасынан келген Снежана Таймасова 2 және 6 шақырымға созылған бәйгеге қатысты. Айта кету керек, ол Стар Чемп атты тұлпармен үшінші орынды иеленсе, Феноменмен мәреге бірінші болып жетті.
Фариза Қазыбекқызы
