Өткен аптада Мемлекет басшысы Қасым-Жомарт Тоқаев отандық бір фирманың аяқ-киімін сатып алғанын желіде жазған еді. Президенттің осындай жарнамасынан соң алматылық аяқ киім фабрикасының дәурені жүріп, тапсырыстар үйіліп түсе бастапты, деп хабарлайды Хабар 24.
Аяқ-киім фабрикасының қожайыны Дәурен Раманқұл, бұл әрине Президенттің арқасында екенін айтады.
"Нақты айтатын болсақ, дүкендердегі сатылым 3 есеге, интернет арқылы сауда 5 есеге ұлғайды. Аяқ-астынан жұмысымыз көбейіп, мәзбіз. Мұндай күрт өсімнің неден болғанын болжап айта алмаймыз, бірақ біздің аяқ-киімімізді Президент сатып алды, содан соң да ағылуда шығар. Ол кісіге алғысым шексіз", - дейді кәсіпкер.
Дәурен Раманқұл аяқ-киім шығаратын цехты үш жыл бұрын ашқанын айтады. Әрине, бірден екі проблемаға тап келген: Алматыда аяқ-киім жасайтын шеберлер жоқ, оның үстіне ішкі нарықта сапалы шикізат та жоқ.
Ол Қасым-Жомарт Тоқаев сатып алған туфлидің құны 21 мың теңге екенін айтты.
"Біздің аяқ-киімдер түріктікіне, орыстікіне қарағанда 2-3 есе арзан. Оның үстіне біз сапалы таза былғарыны қолданамыз", - дейді ол.