Төтенше жағдай мен карантин кезінде адамдардың өмірі мен денсаулығын қорғау үшін полиция қызметкерлері, дәрігерлермен бірге алдыңғы шепте жүрді, деді бүгін ҚР Ішкі істер министрі Ерлан Тұрғымбаев, деп хабарлайды zakon.kz.
- Ішкі істер министрлігі елдегі қауіпсіздікті қамтамасыз етуге бар күшін салды. Төтенше жағдай кезінде 400 блок-бекет, 200 санитарлық бекет жұмыс істеді. Аса маңызды мемлекеттік және стратегиялық нысандарға күзет қойылды. Ауруды таратпау үшін тұрғынүйлер коршауға алынды. 9 мыңнан астам адам іздестіріліп, табылды. Осының барлығына Ұлттық Ұлан, мен ішкі істер органдарынан 50 мыңнан астам қызметкер жұмылдырылды. Өз уақытымен санаспай, отбасынан алыс болса да, күндіз-түні қызмет жасап, Отан алдындағы борышын, ел алдындағы міндетін адал атқарған қызметкерлерге және біздің жұмысымызға түсіністік танытқан тұрғындарға рахмет айтамын. Көп үлес қосқан еріктілерге де алғыс білдіргім келеді, - деді министр.
