Қырғызстан сыртқы істер министрі Руслан Қазақбаев бастаған делегация 5-6 қарашада Өзбекстанда болады.
Бұл туралы Өзбекстан СІМ баспасөз қызметі хабарлады.
"Келіссөздер барысында саясат, сауда-экономика, көлік-коммуникация, мәдениет және басқа да салаларда екі жақты қарым-қатынасты дамыту мәселелері талқыланады", - делінген министрлік хабарламасында.
Қырғызстанның ресми өкілдері өткен айда үкіметі ауысқалы бері алғаш рет Өзбекстанға ресми сапармен шығып отыр.
4 қазандағы парламент сайлауынан соң Қырғызстан саяси дағдарысқа тап болды. 15 қазанда қырғыз президенті Сооронбай Жээнбеков қызметтен кетті.
Қырғызстан сыртқы істер министрі Руслан Қазақбаев Ташкентке 5 қарашада келеді. Бұның алдында ол Қазақстан мен Ресейде болды.