Жедел-алдын алу іс-шарасын өткізу барысында Алматы қаласының әуежайындағы Желілік полиция бөлімінің қызметкерлері Қазақстан Республикасының азаматтық туралы заңнамасын бұзған Түркия азаматшасын анықтап, ұстады, деп хабарлайды zakon.kz.
Тексеру барысында көлік полицейлері Қазақстан Республикасы мен Түркияның қос азаматтығы бар «Стамбул-Алматы» бағытындағы әуе рейсімен ұшып келген 32 жастағы әйелді әкімшілік жауапкершілікке тартты.
Оған қатысты ҚР ӘҚБтК-нің 496-бабының 2-бөлігімен, яғни Қазақстан Республикасының заңнамасында белгіленген мерзімдерде шетел азаматтығын алу фактісін хабарламау бойынша әкімшілік хаттама толтырылды.
Алматы қаласының мамандандырылған ауданаралық әкімшілік сотының шешімімен Түркия азаматшасына 200 АЕК мөлшерінде (583 400 теңге) айыппұл түріндегі әкімшілік жаза тағайындалды.
Ағымдағы жылдың басынан бері Көліктегі ПД қызмет көрсету аумағында ҚР Халықтың көші-қоны саласындағы заңнамасын бұзған 124 азамат әкімшілік жауапкершілікке тартылды, оның ішінде 6 азамат қос азаматтығы бар тұлғалар (Ресей-3, Түркия-2, АҚШ-1). Сондай-ақ, сот қаулыларымен 26 шетелдік азамат елден тысқары шығарылып, олардың барлығына 5 жылға дейін елге кіруге тыйым салынды, деп ескертеді Көліктегі полиция департаментінің баспасөз қызметі.