"Qazaqstan" және "Qazsport" телеарналары футболдан Америка Кубогының ойындарын тікелей эфирде көрсетеді, деп хабарлайды zakon.kz.
"Қазақстан" телерадиокорпорациясы футболдан Америка Кубогының ойындарын көрсету құқығын иеленді. Оңтүстік Америка құрамалары арасындағы турнир 13 маусым мен 11 шілде аралығында Бразилияда өтеді. Турнирдің барлық матчтарын қазақстандық жанкүйерлер "Qazaqstan" және "Qazsport" телеарналарынан тікелей эфирде көре алады.
Бастапқыда, Копа Америка-2021 Аргентина мен Колумбия алаңдарында өтуі тиіс болатын. Бірақ турнирдің басталуына екі апта қалғанда Оңтүстік Америка футбол конфедерациясы коронавирусқа байланысты жарысты Бразилияға ауыстыру туралы шешім қабылдады.
Сырттан шақыртылған екі құрама – Австралия мен Катар жарыстан бас тартқаннан кейін, Америка Кубогына 10 команда қатысатын болды. Олар екі топқа бөлінген. Ширек финалға әр топтан төрт командадан шығады.
Соңғы Копа Американың жеңімпазы - Бразилия құрамасы.