Қазақстанның бұрынғы президенті Астанадағы өзі салған ғимарат - бас мешітте жұма намазынан кейін жұртшылық алдында сөз сөйледі. Оның айтуынша, мұндай зәулім мешіт "еш жерде" жоқ.
"Баяғыда Византия патшасы Константин Айя-Софияны салғанда Сүлеймен патшаға "Мен сенен де үлкен мешіт салам" деп айтқан екен. Мен де Константинге "Сенен де үлкен мешіт салдым" деп айтуыма болады екен. Айтылған сөздер, тілектің бәрі Алланың құлағына шалынсын. Алла кешірімді, мейірімді. Біліп-білмей істеген күнәларым болса, кешірсін", - деді ол.
Ол сонымен бірге Қағбаға (мұсылмандар құлшылық ететін аса қастерлі орындағы тұңғыш ғимарат) алғаш кіргенде не тілегенін еске алды.
"Баяғыда Қағбаның ішіне бірінші рет кіргенімде бірінші "Қазағыма бақыт-береке, болашақ бере гөр" дегем. Бұл, мінекей, келе жатыр. Ризамын. Аман болыңыздар! Жүздерің жарқын болсын, жанұяларыңмен бәрің бақытты болыңдар!", - деді Назарбаев.
