Заң жобасы 2010 жылғы 18 маусымдағы Кеден одағының кедендік аумағындағы еркін (арнайы, ерекше) экономикалық аймақтар және еркін кедендік аймақтың кедендік рәсімі мәселелері жөніндегі келісімге өзгерістер енгізу туралы хаттаманы ратификациялауға бағытталған.
Хаттамаға Еуразиялық экономикалық комиссия Кеңесінің отырысында 2021 жылғы 19 қазанда қол қойылған.
Хаттаманың негізгі мақсаты - Еуразиялық экономикалық одақ (ЕАЭО) туралы шартты негізге ала отырып және ЕАЭО Кеден кодексі туралы шарттың ережелерін назарға ала отырып, келісімнің мәтіні мен бірқатар баптарына өзгерістер енгізу.
Индустрия және инфрақұрылымдық даму министрі Марат Қарабаев атап өткендей, хаттама құқықтық және редакциялық өзгерістерді, оның ішінде негізгі терминология мен кедендік реттеу мәселелерін Еуразиялық экономикалық одақтың Кеден кодексінің нормаларына сәйкес үйлестіруді көздейді.
Осылайша «Кеден одағының комиссиясы» ұғымы осы заңның мәтініне сәйкес «Еуразиялық экономикалық комиссия» деген сөзбен, сонымен қатар «Кеден одағына мүше мемлекеттің аумағы» сөзі «Еуразиялық экономикалық одаққа мүше мемлекеттің аумағы» деген ұғыммен ауыстырылды.