Мемлекет басшысы Қасым-Жомарт Тоқаевтың көңіл айту жеделхатын ҚР Президентінің баспасөз хатшысы Руслан Желдібай Facebook-тегі парақшасында жариялады.
"Әулеттеріңіздің ардақтысы, елге танымал, халық сыйлаған абыройлы ақсақал Құдайберген Айтбайұлының дүниеден өтуіне байланысты көңіл айтамын. Құдайберген Айтбайұлы ауыл шаруашылығы саласында көп жыл қажырлы қызмет етіп, еңбек ардагері атанды. Адамгершілік асыл қасиеттерімен өз ортасына сыйлы, ағайын-туысқа қадірлі жан болды. Ұлағатты ұрпақ өсіріп, дарынды ұл-қыздарды тәрбиелей білді. Айнала төңірегіне мейірім шуағын шаша білген Құдайберген Айтбайұлының жарқын бейнесі оны білетіндердің жадында сақталады. Марқұмның иманы саламат, жаны жәннатта болсын", – деп жазылған жеделхатта.
Айта кетсек, бүгін әлемге танымал әнші Димаш Құдайбергеннің атасы Құдайберген Айтбаев 82 жасында дүниеден озғаны туралы қаралы хабар тарады. Мемлекеттік және қоғамдық қызметтерде талмай еңбек еткен Құдайберген Айтбаев 2019 жылы "Ерен еңбегі үшін" медалімен марапатталған болатын.
