ПКК төрағасы Олег Костенко атап өткендей, ауылдық округтің бұрынғы әкімі өз қызметіне атүсті қараған, қайғылы оқиға орын алған Бесқауғадағы отбасына лайықты деңгейде көмек көрсетпеген, бақылау жасамаған, деп хабарлайды Pavlodarnews.kz.
"Жергілікті атқарушы органдар өкілі ретінде ол тұрмыс жағдайы ауыр отбасыларын ерекше бақылауда ұстауы тиіс. Біз онда болған кезде антисанитарияға кезіктік. Ауыл бөлімшесінде небары жеті-ақ үй бар", - дейді партия облфилиалының атқарушы хатшысы Айгүл Мәлікова.
Одан бөлек, партиялықтар қызметтік міндеттерін толық орындамай, қайғылы жағдайға жол берген барлық адам жауапкершілікке тартылуы тиіс деген уәж де айтылды.
Айта кетейік, облыс әкімі Асайын Байхановтың тапсырмасымен Қоянды ауылдық округінің әкімі, Екібастұз қаласы әлеуметтік қорғау бөлімінің басшысы жұмыстарынан босатылды. Сонымен бірге, Екібастұз қаласы әкімінің шешімімен Шідерті ауылының әкімі жұмыстан босатылды. Полицейлерге де қатысты жаза қолданылатын болады.
17 қарашада Бесқауға ауылында жеті жасар Милана Давыдованың жоғалғаны туралы ақпарат тарады. Кейін баланың өлтірілгені белгілі болды. Қыздың анасы негізгі күдікті ретінде істі болуда.
