"Қазақстан Республикасының кейбір заңнамалық актілеріне білім және тәлімгерлік мәселелері бойынша өзгерістер мен толықтырулар енгізу туралы" заң жобасын депутат Асхат Аймағамбетов таныстырды. Оның айтуынша, заң жобасының бір ережесінде мектептерде балалар үшін жағымсыз ақпаратты таратуға тыйым салу қарастырылған.
"Білім беру ұйымдарында діни және басқа да зиян ақпараттың таралуына жол бермеу үшін стандарт ұсынылды".Асхат Аймағамбетов
Депутат мұндай тыйым салудың қажетін мектептің зайырлы ұйым екенін, ол жерде діни ақпарат болмау керек екенімен түсіндірді.
"Бұл анық норма түрлі діни қайраткерлерді және басқа да діни әдебиеттерді немесе ақпаратты мектептерге кіргізбеуге негіз болады деп ойлаймын. Біздің мектептер зайырлы мекеме, түсінесіз бе? Сондықтан зайырлы мекеме толығымен зайырлы болуы керек. Егер діни әдебиетті оқығыңыз келсе мүмкіндігіңіз жетеді, ата-анасы бар. Дегенмен балалар кәмелет жасына толғанша қорғалуы керек (діни насихаттан – ред.). Өйткені оларға қорытынды шығару өте қиын", – деп түйіндеді Асхат Аймағамбетов.
Депутаттардың бастамасымен әзірленген заң жобасында балалардың қауіпсіздігін қамтамасыз етуге және олардың құқығын қорғауға қатысты бірқатар норма қарастырылған.
