Әбиба Абужақынова іріктеу кезеңінде аргентиналық Кейси Перафан мен сербиялық Андреа Стоядиновты жеңіп, жартылай финалға шыққан. Жартылай финалда тәжірибелі израильдік Шира Ришонидің жауырынын жерге тигізді.
Ғалия іріктеуде әуелі француз Мелани Вьені, сосын америкалық Мария Селия Лабордені, ширек финалда испан Лаура Мартинес Абеленданы голден-скорда ұтқан. Ал Ғалия Тынбаева жартылай финалда португалиялық Катарина Костаны жеңді. Екі дзюдошы голден-скорды қоса есептегенде 11 минут 14 секунд күресті.
Бүгін татамиге шыққан қалған Ұлттық құрама өкілдерінің нәтижесі мынандай:
Ерлер арасында 60 келіге дейінгі салмақта Мағжан Шамшадин алғашқы кездесуде 18 жастағы жапониялық Ямато Фукудаға есе жіберді. Осы салмақтағы Қанат Сейілхан үндістандық Виджай Кумар Ядавты ұтқанымен, украиналық Артем Лесюкке қарсы тұра алмады.
Сұңғат Жұбатқан мен Айболат Ыстыбай (66 келі), Әйгерім Әбілқадырова мен Толғанай Әбеуова (52 келі) іріктеуде қарсыласқа жол берді.
Айта кетейік, Гран-при 29 қаңтарға дейін Тежу өзенінің жағасында өтеді. Мұнда 83 елдің 600-ге жуық татами шебері рейтинг ұпайы үшін таласып жатыр.
