60 келі салмақ дәрежесінде айқасқан Талғат Сырымбетов финалда турнир қожайыны Азрак Бабировты жеңді. Үш раундта да қарқынын бәсеңдетпеген Талғат бірінші раундта-ақ қарсыласының аптығын басып тастаған. Ал үшінші раундта әзербайжандық боксшы, тіпті, жұдырықтасудан қалды. Нәтижесінде, төрешілердің бірауызды шешімімен Сырымбетов жеңіске жетті.
71 келі салмақ дәрежесінде жұдырықтасқан жерлесіміз Дархан Дүйсебай финалда өзбекстандық Бекзод Хамидовтан басым түсті. Әр раунд сайын үстемдігін байқатқан Дархан алғашқы екі раундта ұпайын түгелдеп, үшінші раундта шегіне жұдырықтасып, тағы мықтылығын көрсетті.
92 келідегі боксшымыз Сағындық Тоғамбай Бакудегі бәсекенің финалында турнир қожайыны, әлем чемпионы Лорен Альфонсо Домингесті жеңіп, жергілікті көрерменнің көзайымына айналды. Қарсыласына еш мүмкіндік бермеген жерлесіміз үш раундта да Әзербайжанның кубалық қабыланын қақырата ұрды.