Осы табысынан кейін отандасымыз кәсіпқой теннисшілер қауымдастығының (ATP) рейтингісінде өз көрсеткішін айтарлықтай жақсартты.
Турнирдің бас жүлдесі сарапқа салынған шешуші матчта Омарханов жарыстың басты фавориті, түркиялық Мерт Алкаямен (383-ші ракетка) кездесті.
Үш сетке созылған тартысты бәсеке 7:5, 1:6, 7:5 есебімен Әмірдің жеңісімен аяқталды. Бірінші партияда басым түскен қазақстандық спортшы екінші кезеңде есе жібергенімен, шешуші сәтте қайсарлық танытып, жеңісті жұлып алды.
Бұл жетістік Омархановқа кәсіби мансабындағы төртінші титулын сыйлады. Бұған дейін Әмір Тунистегі турнирлердің жекелей және жұптық сынында үздік шықса, Испанияның Манакор қаласында өткен жарыста жұптық сында топ жарған болатын.