Қазақстандық ғалым құлағында мүкісі бар қазақ тілді балалардың сөйлеуін дамытатын әдістеме ойлап тапты
Сурет: Facebook/gylym.jogarybilim
ҚР Ғылым және жоғары білім министрлігі таратқан ақпаратқа сүйенсек, бүгінгі таңда 86 балаға зерттеу жүргізілді. Олардың жетеуі дыбыстар мен сөйлеуді қабылдау, дыбысқа еліктеу, сөз тіркестері және қарапайым сөйлемдер атты төрт кезеңнен тұратын қайта оңалтудан өтіп жатыр.
Рауан Байчинов осы әдіспен екі жылдан бері оқытылып жүрген балалардың бірі бүгінде сөйлем құрап, сөйлеп жүргенін айтады. Тағы біреуі кохлеарлы имплант қойғалы дыбыстар мен дауысқа елеңдемейтін болған. Бірақ екі ай бойы арнайы әдістемемен үйретілген бала дыбыстарды жақсы қабылдап, жақсы ести бастаған. Дегенмен, ол әлі қайта оңалтудың үш кезеңінен өту тиіс.
Әдістеме үш жастан жеті жасқа дейінгі балаларға арналған.Жас ғалым авторлық құқықпен қорғалатын объектілерге құқықтар тізіліміне мәліметтер енгізу туралы куәлік алған.
Қазіргі күні бұл әдістемені ШҚО Білім басқармасының "Облыстық психологиялық-медициналық-педагогикалық кеңес беру" КММ, "Әлеуметтік қызметкерлер мен еріктілер қауымдастығы" қоғамдық ұйымы және университет базасында ашылған "Dana bala" үздіксіз және инклюзивті білім беру орталығы қызметкерлері қолдануда.
Ғалым Сәрсен Аманжолов атындағы ШҚУ "Dana bala" үздіксіз және инклюзивті білім беру орталығында қызмет атқарады.
