Министрлік Қаракөлдегі аққулардың өліміне қатысты пікір білдірді

Қаракөлде аққулардың өлексесі табылды, сурет - Zakon.kz жаңалық 19.12.2022 18:55

Сурет: видеодан скриншот

19 желтоқсан күні Маңғыстау облысындағы Қаракөл көлінде түсірілген видео Қазнет қолданушыларын алаңдатқан еді. Осыған орай Экология, геология және табиғи ресурстар министрлігі түсінік берді, деп хабарлайды Zakon.kz.

Маңғыстау облыстық аумақтық инспекциясының мәліметінше, аталған фактті тексеріп, құстар өлімінің себебін анықтау мақсатында оқиға орынына аталған инспекция өкілдері, Үстірт мемлекеттік табиғи қорығы, Маңғыстау облысының ветеринария басқармасы, Ауыл шаруашылығы басқармасы қызметкерлері, «МАЭК-Қазатомөнеркәсіп» ЖШС экологтары барды.

"Аумақты тексеру барысында мамандар 10 аққудың өлексесін тапты. Алдын ала болжам бойынша, олар қыстан аман қалу үшін май жинап үлгермеген 1 жылдық құстар", - делінген министрлік хабарламасында.

Мамандардың айтуы бойынша, аққулар өлімінің тағы бір себебі күннің суытуымен де байланысты болуы мүмкін.

"Маңғыстау облысында 1 желтоқсаннан бастап ауа температурасы -15°С дейін төмендеді. Каспий теңізі мен Қаракөл көлінің жағасында мұз қатқан", - делінген хабарламада.

Қазір құс өлімінің себебін анықтау мақсатында, су мен құстардан сынамалар алынып, тексеруге жолданды. Қосымша ақпарат жарияланады.

Есептік деректер бойынша, Қаракөл көлінде 10 000-ға дейін аққулар қыстайды

Оқи отырыңыз