Қазақстан мен Өзбекстан арасындағы рейс саны 2,5 есе артты
Сурет: Zakon.kz
Бұл туралы 2023 жылғы 2 наурызда Ташкентте Қазақстан мен Өзбекстанның авиациялық билік органдарының келіссөздерінде белгілі болды.
Жиында Қазақстан Республикасының делегациясын ҚР ИИДМ Азаматтық авиация комитетінің төрағасы Талғат Ластаев, Өзбекстан Республикасының делегациясын Көлік министрінің орынбасары Жасүрбек Хориев басқарды. Келіссөздер барысында тараптар рейстер санын одан әрі арттыру және ұшу географиясын кеңейту мәселелерін талқылады.
Осылайша, қол жеткізілген уағдаластықтар негізінде осы жылдың көктемгі-жазғы кезеңінен бастап "Эйр Астана" және Uzbekistan Airways әуе компаниялары Алматы – Ташкент бағыты бойынша жиіліктер санын аптасына 14–тен 20 рейске дейін және Астана-Ташкент бағыты бойынша аптасына 6-дан 12 рейске дейін ұлғайтуды жоспарлап отыр.
Сонымен бірге бәсекелестікті және сауда-экономикалық ынтымақтастықты дамыту, авиабилеттердің құнын төмендету мақсатында Қазақстан мен Өзбекстан арасындағы барлық шарттық бағыт бойынша әуе тасымалдаушыларды бірнеше рет тағайындау туралы уағдаластыққа қол жеткізілді.
Сонымен қатар қазақстандық әуе тасымалдаушылар Самарқан, Ферғана, Бұхара және Қарши қалаларына тікелей тұрақты рейстер ашуды жоспарлап отыр.
Тараптар ұшу қауіпсіздігі және авиациялық қауіпсіздік саласындағы ынтымақтастық мәселелерін талқылады.
Тараптар өңірлік авиациялық қауіпсіздік пен ұшу қауіпсіздігін арттыру үшін ынтымақтастық пен тәжірибе алмасуды жалғастыруға келісті.
