Ақтау қаласы мен қала маңындағы ауылдарды газбен қамтуға үкімет резервінен 3,7 млрд теңге бөлінеді

Сурет: Zakon.kz

ҚР үкіметі "Жаңаөзен – Ақтау" газ құбырынан автоматтандырылған газ тарату стансасы орнатылатын магистральдық газ құбыры құрылысын аяқтау үшін өз резервінен 3 млрд 695 млн 925 мың теңге бөледі, деп хабарлайды Zakon.kz.

ҚР үкіметінің баспасөз қызметінің мәліметінше, премьер-министр Әлихан Смайылов тиісті қаулыға қол қойды.

Бүгінде Ақтаудың солтүстік бөлігі қарқынды дамып келеді.

Атап айтқанда, көп қабатты тұрғын үйлер мен әлеуметтік нысандар құрылысы жүріп жатыр. Биыл қаланың кеңейіп келе жатқан бөлігін жылумен қамту мақсатында бірқатар блок-модульді қазандықтарды орнату және екі жаңа қазандық салу жоспарланған. Жаңа қуат көздері газбен жұмыс істейтін болады, осыған байланысты тиісті инфрақұрылымды кеңейту қажет.

"Жалпы ұзындығы 52 шақырым болатын жаңа газ құбыры Ақтау қаласының жаңа шағын аудандары, Мұнайлы ауданындағы Қызылтөбе, Дәулет, Баянды ауылдары, сондай-ақ Түпқараған ауданындағы Ақшұқыр мен Сайын Шапағатов ауылдарының 150 мыңға жуық тұрғынын жылумен және тауарлық газбен қамтамасыз етеді".ҚР үкіметінің баспасөз қызметі

Үкіметтің ресми сайты жариялаған мәлімет бойынша, жоба құрылысы Каспий энергетикалық хабының сыртқы инфрақұрылымын дамыту аясында жүргізіліп жатыр.

Оқи отырыңыз