Алматыда 1 қарашадан бастап тарифтердің көтерілуіне байланысты өтемақы өседі

Өтемақы, тарифтер, Алматы қаласы, электр энергиясының тарифі, сурет - Zakon.kz жаңалық 02.11.2023 10:40

Сурет: Zakon.kz/Максим Золотухин

Алматы мәслихатының Мұқтаж азаматтардың жекелеген санаттарына коммуналдық қызметтерге тарифтердің көтерілуіне байланысты әлеуметтік көмек көрсету және өтемақы төлеу мөлшерін белгілеу қағидасына өзгеріс енгізетін шешім әзірленді, деп хабарлайды Zakon.kz.

Атап айтқанда, 2023 жылғы 1 шілдеден бастап кірісті есепке алмағанда 0,5 АЕК мөлшерінде көрсетілетін әлеуметтік көмектің мөлшері 2023 жылғы 1 қарашадан бастап 0,6 АЕК болады. Яғни, 1725 теңгеден 2070 теңгеге дейін өседі.

Түсіндірме құжатта бұған электр энергиясы тарифтерінің көтерілуі себеп болғаны жазылған.

Бұдан бөлек, әлеуметтік көмек көрсету мерзімі 2024 жылдың 30 маусымына дейін ұзартылды. Бұрын ереже 2023 жылдың 31 желтоқсанына дейін жарамды болған.

Егер көрсетілетін қызметті алушы 2023 жылғы 31 желтоқсандағы жағдай бойынша әлеуметтік көмек алушы болып танылса, онда оған көрсетілетін қызметті берушіге хабарласпай әлеуметтік көмек тағайындалады.

2023 жылғы 31 желтоқсаннан кейін өтініш бергендерге әлеуметтік көмек өтініш берілген айдан бастап тағайындалып, төленеді.

Әкімдіктің мәліметінше, 2023 жылғы 1 қарашада 120 мың азаматқа әлеуметтік көмек көрсетілген. Жоба қалалық бюджеттен қаржыландырылады және 2023 жылдың соңына дейін қосымша қаражат қажет емес. 2024 жылға қаржыландыру 4 112 млн теңге және 315 430 адамға есептелген.

Құжат 15 қарашаға дейін қоғам болып талқылау үшін Ашық НҚА сайтында жарияланды.

Оқи отырыңыз