Смайылов McDonald's-тың Қазақстаннан кетуіне қатысты пікір білдірді

Сурет: mcdonalds.kz

11 қаңтарда үкімет отырысында премьер-министр Әлихан Смайылов McDonald's-тың Қазақстаннан шығуы туралы айтты, деп хабарлайды Zakon.kz.

Министрлер кабинеті басшысының айтуынша, елімізде халықаралық брендтердің болғаны жақсы, бірақ фастфудтың адамға тигізетін пайдасы шамалы.

"McDonald's-тың нарықтан кетуі біздің елдегі инвестициялық ахуалға немесе басқа да жағдайларға байланысты емес. Бұл McDonald's-тың Ресей нарығынан кетуіне тікелей байланысты. Жұмыс аясында шикізат пен жартылай фабрикаттар Ресей арқылы жеткізілді. Тағы қандай себептер болды? Соның бірі – McDonald's өз өнімдеріне жоғары талаптар қояды".Әлихан Смайылов

Оның айтуынша, мейрамханаларға өнімді жеткізу үшін жеткізушінің бірқатар сертификаты болуы керек. Өнімдер мен қаптаманың сапасы жақсы болуы керек. Бұл ретте өте қатаң талаптар бар.

"Барлық қатаң талапты орындау үшін инвестор үлкен қаражат бөліп, инвестиция салуы керек. Бірақ қазақстандық нарық шектеулі. Сондықтан мұндай ауқымды инвестиция қысқа мерзімде ақталмайды. Қазір компания шешіміне қарап, мынаны байқаймын: Қазақстандағы жұмыс орындарын сақтау керек. Бұл компанияда 2000-ға жуық адам жұмыс істейді. Сондықтан біз халықаралық брендті пайдаланбай жұмысымызды жалғастыруымыз керек".Әлихан Смайылов

Смайылов Фаст-фуд компаниясы жұмысын тұрақты жалғастыру үшін қазақстандық азық-түлік өндірушілерден шикізат пен жартылай фабрикаттарды алу мәселесін шешетініне сенеді.

10 қаңтар күні "Food Solutions KZ" ЖШС бас директоры Әсет Машанов Қайрат Боранбаевқа қатысты сот процесіндегі үзіліс кезінде ресейлік "Вкусно и Точка" Қазақстандағы McDonald's-ты ауыстыра ала ма деген сұраққа жауап берді.

Оқи отырыңыз