Синоптиктер сенбіде еліміздің ірі қалаларындағы метеожағдайлар бойынша болжаммен бөлісті

"Қазгидромет" РМК мамандарының мәліметінше, 13 мамырда Қазақстанның барлық қалаларында қолайлы метеожағдайлар күтіледі, деп хабарлайды Zakon.kz.

"Қазақстан бойынша ауаның қолайсыз метеорологиялық жағдайлары байқалмайды", делінген Қазгидромет хабарламасында.

Қолайсыз метеожағдайлар - атмосфералық ауаның беткі қабатында зиянды (ластаушы) заттардың жиналуына ықпал ететін қысқа мерзімді метеорологиялық факторлардың (тымық ауа, әлсіз жел, тұман, инверсия) жиынтығы.

Бұған дейін хабарланғандай, атмосфералық фронтальды бөліктердің өтуіне байланысты еліміздің басым бөлігінде ауа райының тұрақсыз сипаты сақталады. Найзағай ойнап, жаңбыр жауады.

Синоптиктер атап өткендей, күндіз еліміздің солтүстік-батысында, солтүстігінде бұршақ жауады деп болжанады. Ал Алматыда ыстық ауа райы болжанады, алайда күн құбылмалы.

Республикамыз бойынша жел күшейіп, оңтүстік-батыста тұман, оңтүстікте шаңды дауыл болады деп күтіледі.