Алматы облысында ұрланған 20 бас жылқы Түркістан облысындағы ауылдан табылды

Алматы облысында 15,1 млн теңгенің малын ұрлағандар қамауға алынды, деп хабарлайды Zakon.kz polisia.kz-ке сілтеме жасап.

2023 жылғы 17 сәуірде Кеген ауданының полиция бөліміне Сарыкөл ауылының 59 жастағы тұрғыны Қарқара кентінің маңындағы жайылымнан құны 15,1 млн теңге болатын 20 бас жылқысының ұрланғаны жайында арызданған.

Дерек ҚР Қылмыстық кодексінің 188-1-бабы 4-бөлігі 2-тармағы ("Мал ұрлау") бойынша аудандық полицияда тіркелген.

Аталған дерек бойынша жедел-іздестіру іс-шараларын өткізу кезінде 18 мамырда 28, 27 және 26 жастағы үш күдіктіні ұсталды.

Сурет: polisia.kz

Қазіргі уақытта тергеу іс-шаралары жүргізіліп жатыр. Ұсталған азаматтардың басқа да осыған ұқсас қылмыстарға қатысы бар-жоғы тексеріліп жатыр.

Ұрланған мал Түркістан облысының Қарабұлақ ауылынан табылып, тәркіленді. Ұсталғандарға қатысты қамауда ұстау бұлтартпау шарасы таңдалды.