Қасым-Жомарт Тоқаев Ұлттық қордан балаларға қаражат бөлу туралы жарлыққа қол қойды
Сурет: pexels
Тиісті өзгеріс 2022 жылғы 10 қыркүйектегі "Қазақстан Республикасының мемлекеттік қаржысын басқарудың 2030 жылға дейінгі тұжырымдамасын бекіту туралы" жарлыққа енгізілді.
Атап айтқанда, "ҚР ҰҚ қаражатын пайдалану" тарауына мынадай толықтыру енгізілді:
"Қазақстан Республикасының заңнамасына сәйкес нысаналы талаптардың төлемдері түрінде және нысаналы жинақтардың аударымдары мен төлемдеріне байланысты банктің көрсететін қызметтеріне ақы төлеу бойынша шығыстарды жабуға пайдаланылады. Нысаналы талаптар деп Үкіметтің он сегіз жасқа толмаған Қазақстан Республикасының азаматтары алдындағы міндеттемелері түсініледі, ол есепті жылдың алдындағы он сегіз жыл үшін орташа алынған ҚРҰҚ-ның инвестициялық кірісінің және есепті жылдың алдындағы он сегіз жыл үшін орташа алынған, жыл сайын осы сомаға есепке жазылатын инвестициялық кірістің елу пайызы есебінен жьгл сайын қалыптастырылады".
Құжатқа сәйкес, тұрақтандыру функциясын іске асыру мақсатында Ұлттық банк қаржы нарығындағы қалыптасқан жағдайға байланысты Ұлттық банк басқармасы белгілеген тәртіппен ҚР ҰҚ-ның активтерін айырбастауды және қайта айырбастауды жүргізеді. Бұл операциялар кепілдік берілген және нысаналы трансферттерді бөлу үшін жүргізіледі және Ұлттық банктің интервенцияларына жатпайды. ҚРҰҚ-дан кепілдендірілген және нысаналы трансферттер бюджеттік рәсімдерге сәйкес республикалық бюджет арқылы өтуге тиіс.
Жарлық қол қойылған күнінен бастап күшіне енеді.
Бұдан бұрын хабарланғандай, 18 жасқа толғаннан кейін бұл қаражат баланың меншігінде болады, ол оны оқуға немесе баспана сатып алуға пайдалана алады. Бұл ретте шетелдік оқу орнында оқу ақысын төлеуге қаражатты пайдалануды шектемеу жоспарланған.
Төлем механизмі 2024 жылы басталады. Әзірлеушілердің айтуынша, Қазақстан Республикасы Ұлттық қорының инвестициялық кірісінің бір бөлігі 6,5 миллион балаға бөлінеді. Егер бала 2023 жылы дүниеге келген болса, онда ол шамамен 3,5 мың доллар алады.
