Тоқаев FAO директорына Алматының әйгілі апортынан дәм татқызды
![Тоқаев, сурет - Zakon.kz жаңалық 19.01.2024 19:17](https://kaz.zakon.kz/pbi/WEBP/2024-01-19/file-3b9b703f-2aca-4afa-8ddb-0f5f8c1092ea/400x288.webp)
Бұл туралы Ақорда хабарлады.
"Қазақстан алманың отаны ретінде кеңінен танымал. Апорт сұрпы еліміздің ең ірі мегополисі – Алматының маңайында өседі. Біз алманың осы түрін өздеріңізбен күш біріктіре отырып, әлем нарығына шығаруға ниеттіміз. Осы бастамамызды іске асыру барысында Сіздің жеке қолдауыңызға арқа сүйейміз", - деді Қасым-Жомарт Тоқаев.
Сонымен қатар Мемлекет басшысы Халықаралық Аралды құтқару қоры және Азық-түлік қауіпсіздігі жөніндегі Ислам ұйымының төрағасы ретінде Қазақстанның басымдықтары туралы айтты.
Қасым-Жомарт Тоқаев Ұйымды Арал бассейніндегі жерлердің топырағын мелиорациялауға және су ресурстарын басқаруға қатысты жобалар әзірлеу ісіне жан-жақты қолдау көрсетуге шақырды. Сондай-ақ Президент елімізде FAO-ның Орталық Азиядағы өңірлік бөлімшесін ашуды ұсынды.
![Тоқаев, сурет - Zakon.kz жаңалық 19.01.2024 19:17](https://kaz.zakon.kz/pbi/WEBP/2024-01-19/file-2c8062aa-70ca-4eda-8333-4ec14a065aca/800x524.webp)
Сурет: akorda
Азық-түлік және ауыл шаруашылығы ұйымының бас директоры жаһандық азық-түлік қауіпсіздігін қамтамасыз ету және гуманитарлық көмек көрсету ісінде Қазақстан аймақта ғана емес, бүкіл әлемде елеулі рөл атқаратынын атап өтті.
![Тоқаев, сурет - Zakon.kz жаңалық 19.01.2024 19:17](https://kaz.zakon.kz/pbi/WEBP/2024-01-19/file-8c49f0f0-57fb-4e0a-a9a2-a2852b184e44/800x538.webp)
Сурет: akorda
Кездесу соңында Президент мазмұнды әңгіме-дүкен құрғаны үшін FAO басшылығына ризашылығын білдіріп, оны алдағы Халықаралық Астана форумына қатысуға шақырды.
Қасым-Жомарт Тоқаев Құрметті қонақтар кітабына қолтаңба қалдырды.