Татарстанда "Әзірет Сұлтан" қазақ қорық-музейінің көрмесі ашылды

"Қазан Кремль" мемлекеттік тарихи-сәулет және көркемсурет мұражай-қорығында"Яссауи мұрасы және ежелгі Түркістан" халықаралық көрмесі ашылды. Іс-шараны "Әзірет Сұлтан" мемлекеттік тарихи-мәдени мұражай-қорығы ұйымдастырды, деп хабарлайды Zakon.kz.

Экспозиция 3 бөлімнен тұрады: "Рухани аманат","Яссауи мұрасы","Түркістан – Түркі әлемінің астанасы".

Сурет: Мәдениет және ақпарат министрлігінің баспасөз қызметі

Көрмеде мұражай-қорық қорынан археологиялық, нумизматикалық, этнографиялық құнды жәдігерлердің түр-түрі ұсынылған. Олардың қатарында Қожа Ахмет Яссауи өмірі мен мұрасы туралы қолжазбалар мен картиналар, ілімін жалғастырушылардың еңбектері, дүниежүзілік мұра атанған Қожа Ахмет Яссауи кесенесіне байланысты тарихи артефактілер бар.

Сурет: Мәдениет және ақпарат министрлігінің баспасөз қызметі

Сондай-ақ көрмеге келген көпшілік қасиетті Түркістан тарихымен және қазақ даласының ғасырлар бой қалыптасқан мәдениетімен, оның әлемдік өркениеттегі өзіндік орнымен таныса алады.

Көрме 20 сәуірге дейін жұмыс істейді.