Ермағанбет Бөлекпаев: Қарағанды облысында су тасқынының шарықтау шегі өтті

Ермағанбет Бөлекпаев, мәлімдеме, Қарағанды облысы, су тасқыны , сурет - Zakon.kz жаңалық 05.04.2024 20:20

Сурет: Қарағанды облысы әкімдігінің баспасөз қызметі

Қарағанды облысының әкімі Ермағанбет Бөлекпаев су тасқынының қауіпті кезеңі өткенін айтып, өңір тұрғындары алдында мәлімдеме жасады, деп хабарлайды Zakon.kz.

Бұл туралы Қарағанды облысы әкімдігінің баспасөз қызметі хабарлады.

"Құрметті жерлестер! Біздің облыста су тасқынының қауіпті кезеңі өтті! Өзара бірлігіміздің арқасында біз облысымызда су тасқынының залалын барынша азайттық. Бұл үшін қажетті барлық шаралар жасалды. Мен құтқарушыларымызға, полицияға, әскерилер мен еріктілерге, кәсіпкерлер мен мердігер ұйымдарға және тұрғындарға су тасқынына қарсы шараларға белсенді қатысқаны үшін алғысымды білдіремін. Бүгінгі таңда біздің барлық 237 гидротехникалық құрылыстарымыз үздіксіз жұмыс істеп, қажетті су көлемін қабылдады". Қарағанды облысының әкімі Ермағанбет Бөлекпаев

Биыл Шерубай-Нұра су қоймасы арқылы 256 млн, ал Самарқанд және Ынтымақ су қоймаларынан 410 миллион текше метр су өтті. Мұндай су көлемі 2017 жылы болған еді. Көптеген адамдар сол жылы су тасқыны салдарының қандай болғанын біледі.

"Бұл ретте бұрын қабылданған шаралардың су тасқынының салдарын азайтуда маңызды рөл атқарғанын атап өткім келеді. Әрине, біз штаттан тыс туындаған жағдайларға алдағы уақытта жол бермеу үшін жұмыс жүргізетін боламыз. Тағы да қайталаймын, біз барлық шығынды қалпына келтіруге көмектесеміз", - деді облыс әкімі.

Оның айтуынша, бұл жұмыстар басталып та кеткен.

"Ауылдарды су басып қалмас үшін біз облыстық маңызы бар үш жолды қазуға мәжбүр болдық, бүгінде олардың екеуі қалпына келтірілді. Сегіз жол сумен шайылды, олардың төртеуі тәртіпке келтірілді. Сондықтан, әзірге жол қозғалысында қиындықтар туындауы мүмкін. Барлықтарыңызды шыдамдылық танытуларыңызды сұраймын. Жолдар қысқа мерзімде қалпына келтіріледі. Ақтөбе және БҚО облыстарындағы, Қостанайдағы күрделі жағдайды ескере отырып, біз әріптестерімізге қолдау көрсетуге дайынбыз. Осы ретте біздің жерлестерімізді, отандастарымызды және кәсіпкерлерді қолдау білдіруге шақырамын. Қазіргі жағдайда бірлігімізді танытып, қолдау көрсету аса маңызды", - деп сөзін түйіндеді Ермағанбет Бөлекпаев.

Айта кетсек, бүгін, 5 сәуірде Үкімет басшысы, Су тасқынына қарсы іс-шараларды үйлестіру және су тасқынының салдарын жою жөніндегі республикалық штабтың жетекшісі Олжас Бектенов су басу қаупіне байланысты ТЖ-ның алдын алу жұмыстары жүргізіліп жатқан Шығыс Қазақстан облысына барды.

Оқи отырыңыз