Қазақстандықтарға алаяқтықтың жаңа түрі туралы ескертілді

Сурет: pixabay

Әділет министрлігінің ресми өкілі Талғат Уәли брифингте қазақстандықтарды алаяқтықтың жаңа түрі туралы ескертті. Бұл жолы сот орындаушылары адамдарға қоңырау шалып, белгілі бір қарызды өтеуді талап етуде, деп хабарлайды Zakon.kz.

Талғат Уәли Қазақстанда алаяқтық жағдайлары жиілеп кеткенін айтты.

"Алаяқтар өздерін сот орындаушылары ретінде таныстырып, азаматтардан берешекті өтеуді талап етеді, әйтпесе шоттардың, мүліктің және т.б. бұғатталғаны туралы хабарлайды. Егер сізге осындай қоңырау түссе немесе хабарлама келсе, ақпаратты әділет Министрлігінің, республикалық және өңірлік жеке сот орындаушылар палатасының ресми сайттарында өз бетіңізше тексеріп, қажет болған жағдайда банкке қоңырау шалуды ұсынамыз", – деп кеңес берді ол.

Оның айтуынша, деректерді атқарушылық іс жүргізу органдарының автоматтандырылған ақпараттық жүйесінде дербес тексеруге болады. Бұл сайтты кез-келген іздеу жүйесіндегі интернет-шолғыш арқылы табуға болады.

"Егер сіз борышкер болсаңыз, онда сіздің қарызыңыз туралы ақпарат, сот орындаушысының аты-жөні және оның телефоны шығады. Егер сіз борышкер болмасаңыз, онда қызғылт сары түспен "сұраныс бойынша ештеңе табылмады" деген жазу шығады. Бұл сіздің шоттарыңыз бен мүліктеріңізге ешкім тыйым сала алмайтынын білдіреді. Тек ресми дереккөздерге сеніңіз, деректерді белгісіз тұлғаларға бермеңіз", - деді Талғат Уәли.

28 маусымда Ақмола облысында танысына ішімдік ішкізіп, оның атына заңсыз несие рәсімдеген күдікті ұсталды.

Оқи отырыңыз