Алматы облысында полицейлер "синтетика" өндіретін есірткі зертханасын жойды

Алматы облысының полицейлері Қарасай ауданының аумағында кезекті есірткі зертханасын анықтады, деп хабарлайды Zakon.kz polisia.kz-ке сілтеме жасап.

Үйдің ауласын тінту барысында белгілі бір иісі бар ақ ұнтақты сұйық ыдыстар мен полимерлі қаптар, сондай-ақ синтетикалық есірткі жасауға қажетті реактивтер мен заттар табылды. 

Сурет: polisia.kz

"Есірткіге қарсы іс-қимыл басқармасының қызметкерлерімен 27 жастағы ер адам ұсталды. Жауап алу кезінде ол жоғары ақы төленетін жұмысты Telegram-каналы арқылы тапқаны белгілі болды. Жүргізілген сараптама нәтижесінде алынған заттардың салмағы 10 келіден асатын сұйық түрдегі мефедрон, ұнтақ түрінде шамамен 150 гр, сондай-ақ синтетикалық есірткіні өндіруге арналған 30 литр прекурсорлар мен 80 келі "бром" улы зат екенін көрсетті", - деді Алматы облысы полиция департаментінің бастығы Бауыржан Әленов.

Аталған дерек бойынша қылмыстық іс қозғалды. Күдікті қамауға алынды. Тергеу жалғасып жатыр.