Шымкентте 226 кәсіпкер заңсыз әкімшілік жауапкершілікке тартылған

Шымкенттің Еңбекші ауданы прокуратурасымен жүргізілген талдау нәтижесінде мемлекеттік кірістер басқармасымен 226 кәсіпкерді заңсыз әкімшілік жауапкершілікке тарту фактілері анықталды, деп хабарлайды Zakon.kz.

Атап айтқанда, 2024 жылғы 14 маусымда кәсіпкер "С" Қазақстан Республикасының Салық кодексінің 208-бабының ("Салықтық өтінішті, салықтық есептілікті ұсыну тәртібі") талаптарын бұзғаны үшін ескерту түрінде әкімшілік жауапкершілікке тартылған.

Бұдан бөлек, әкімшілік құқық бұзушылық туралы істі зерделеу барысында басқарма ҚР Әкімшілік құқық бұзушылық туралы кодексінің 744-бабына сәйкес, оған істі қараудың уақыты мен орны туралы хабарламағаны белгілі болды.

Прокурорлық қадағалау актісі арқылы лауазымды тұлғаның заңсыз шығарылған қаулысының күші жойылып, кәсіпкерлердің құқығы қорғалды.

Уәкілетті органның жауапты тұлғалары тәртіптік жауапқа тартылды.